بقلم : ناصر الصافي
نكتب عند لزوم الكتابة…
حتي صارت السنين قصيدة، والحرف يكرر مأساتنا نوتاً تحصى ولا تُعدُ !!
وكل عام يتضمن بضع أحرفٍ مما نشاهد ونتوجع دون ان نحس …
فكتبناها قصيدة لكل عامٍ وعام …
وين خاتيها يابا ؟؟
مخلاية الصبر…
علمنا يابا
لَم الشُتُر
الحال الضهب
الجور الكضب
الحيل التعب
والكاهل خلاص ماااال وأنكفى
لَمَي الرويحة وشحتفا
قول لينا يابا
خاتيها وين؟؟
مخلاية الصبر !!
دنيا وغباشة
وزحليق عقول
حُترُبة !! فيها إتلموا النِمُول
راساً قليييييد
خماها خم
جُوعنا الأكييييد
همانا هم
عشماً بعيييييد
في رجاكَ كم
… و
نِتَابقا …
ولا ناويين نمِيسا ونتسارقا
لا شاقت نفوسنا نضاوقا
قول لينا يابا
خاتيها وين ؟؟
مخلاية الصبر !!
يابا الحال صعيييييب
وباكر…
باكر كئيييييييييب
كل الضراعات كملتها
كفيني ضاعت وضعتها
في إتون نوالك بعتها
لا كفت وفاك ونذرتها
لا حاضت ضراك ونهرتها
وانا ياني يابا البشبهك
أمرق علي لو أندهك
أديني ميل
لو فِيكَ ميل
ميلك مشتت في البلاد والضيقة
سرقوك يابا
أمات النوايب العيقة
إلا بس قول لينا يابا
خاتيها وين ؟؟
مخلاية الصبر !!
والحال المُشهل فقر
جِز لينا يابا
من جَلد مصلايتك
شبعنا وأُكل !!
أملانا بالله اليقين
كان العجين ساب التُكل
كان الحرف ساب الكتاب
لما الكتاب جقلب ثكل
كان العمار طرطش غبي
لما الغباء غيم هطل
شان وحدتنا
ياااااا وحدتنا وينك؟
شان عُروتنا
ياااااا عُروتنا وينك؟
شان يا يابا دينك في الرقاب
حال الرقاب الضماها التُراب
شِن راجي يابا
خاتيها وين ؟؟
مخلاية الصبر !!
زمن النجيع
والأفرنج كبس
هجوا الولاد
خلونا لي عيشة التبس
والساقية دورت
من البحر تدي البحر
من البحر تدي البحر
من البح..
شِن فضل بي غبانا
أكان النيل حِرد مجرانا ؟
رغم الوسااااع والبُور
الحال معضي معانا !!
شِن راجي يابا ؟
خاتيها وين ؟؟
مخلاية الصبر !!
كفاكا يابا فِك المحنة
ما لقيتا في كل اللُغات والسِحنة
المركوز يقع .. يقيف المايل
الجوع الضرب
بلد السحاب الشايل !!
اليتباع ضميرو
مين تاني ليهو يوفي ؟
ان شلع البِريق
يلحق فجيجو يطفي !
إتكوترنا يابا
خَلقاً مفضفضة فاااااضية
وإتشرينا يابا
جبراً نفوسنا وراضية
الفينا اتعرف
سرطان عقولنا الخاوية
مرواد عمانا
يختي البطان الهاوية
في رجاك يابا
خاتيها وين ؟؟
مخلاية !!
والحرب الضروس
يا يابا إتجهجهنا
إتفرطق سمعنا
وإتهتكت عُرانا
والدانة التقع
تعمي العيون نيرانا
إتكتل الصبي
يوم عمروا الجبخانة
والغيم سواااااد
دخاخين كبست فوق سمانا
سِموم وسَموم
هردت جلدنا وحشانا
قول لينا يابا
خاتيها وين ؟؟
مخلاية الصبر !!
هجوا الوِلاد
فوق بلاد الله الواسعة
حرومنا فوق أرض الكنانة
التبق (نيرانا)
وبطانا دقشوا جنوبنا
واااا حسرة جنوبنا الهُولنا
من إنبتر الأرض
صار العِرض درمولنا
يا يابا قول
قول لينا قول
خاتيها وين ؟؟
مخلاية الصبر !!
جنجويد رباطة
وشايله أباطه
سفاحين دمانا
وشُلل مشاطة
تبيع في عروضنا
بي إستعباطة
منعول أبوك
كان دي السياسة نخاسة
منعول ابوك
كان ناسي البلد من ناسا
ومنعول يا سجم
كان راجي يوم تميس فوق راسا
قول لينا قول
يا يابا قول
خاتيها وين ؟؟
مخلاية الصبر !!
ومين قال
السياسة بنادق ؟
ومين قال
السياسة خنادق ؟
ومين قال
حُكم البلد بنجيبوا بالزندية ؟
ومين قال
بالقوة تتحقق المدنية ؟
يا مرتزق
شن دراكا بي الحِكُومة ؟
ومن يومك (صريم) بومة
مترورة وجارنها من قدومة
ديل ملايشك
الإتعفنت هَددُوما
وإت ياكا مخبول
وعقلك طاشي
ماك داري المعاك والغاشي
يا السجم العولاق
سرقوك اولاد ( باااشِي )
أُمات العُقال
الخاوي من لا شي
قول لينا قول
يا يابا قول
خاتيها وين ؟؟
مخلاية الصبر !!
دمرتوا البلد
عاليها صار واطيها
دفنتوا الخلوق
ما عرفنا ليهم جِيها
في هذه البلد
تقدر تاني تجيها ؟
من فعايلك
تاني مافي ليك ندِيها
لكن ..
إطمئن
بكره البلد نبنيها
بي سواعد شبابنا
وحبنا نعليها
و…
نعليها
قول لينا يابا
خاتيها وين ؟؟
مخلاية الصبر !!
سبِح يابا
الدغش جاك تاني
بي حمد الإله
والسبع المثاني
قول يا لطيف
وأعدلنا في قِبلتنا
وأرجع بي المعاك
يا يابا من ضِمنتنا
تمتم دعاك
لا تنسي الوِتِر
من عِشاكا
لي عند الفَجُر
وأقرانا يابا
أكان من تاني قومة
وأرجانا يابا
أكان من تاني قومة
وأطرانا يابا
أكان من تاني قومة
قول لينا قول
يا يابا قول
خاتيها وين ؟؟
مخلاية الصبر !!
مخلاية الصبر
الصبر
مخلاية ال….
صبر.
